dupport me

الأربعاء، 13 أغسطس، 2008

هوليه ؟وعشان إيه بنختلف!

بعد الحمد لله والصلاة والسلام على رسول الله أما بعد: هو ليه إحنا بنختلف وكل واحد فينا بيحاول ينتصر لرأيه بس ؟
كل واحد فينا بيكتب فى مدونته الشخصية بيعبر عن إلى جواه بيعبر عن إبى شايفه فى الحياة بيعبر عن كل حاجة من وجهة نظر
والناس التانية بتعلق ومن حقها برده تقول رأيها فى كلامك وعاجبنى كلمة لأحد المدونين (على أن أرحب بك كما يجب أن يكون .. سأشكرك مرة لإبداء رأيك .. وأشكرك مرتين لإبداء نقدك!! ) . طيب إحنا ليه دايما بندور على نقط الإختلاف ليه مش بندور على نقط الإتفاق الأول وبعدين نتكلم فى الإختلافات ليه مش بندور على إننا نعرف الصح وننتصر للحق مش تنتصر لنفسك بس .دلوقتى إحنا عايزين نصل لأسلوب شيك فى النقاش دلوقتى فرضا لوحد كتب وجهة نظرة فى قضية معينة فى مدونته وإنتى مش عاجبك الكلام خلاص والكلام ده لازم يترد عليه خصوصا مثلا إنه فيه بعض المخالفات لدينا يبقى دلوقتى مين يرد ؟؟؟ إلى هيرد شخص يتوافر فيه 4خصائص
1-إنه يكون على علم كويس قوى بالموضوع إلى هيتكلم فيه يعنى لو موضوع سياسى يكون متابع الموضوع كويس قوى وعارف كل تفاصيله أو لو موضوع دينى يكون برده عارف الأدلة وكل حاجة فيه.
2-إنه يكون شخص قادر على المحاورة عشان أكيد هو هيرد والتانى هسرد هيقعدوا يرد على بعض كام مرة والشخص إلى عنده ميزة الحوار وفن اللإقناع هو إلى هينتصر حتى لو مش معاه الحق (فى بعض الأحيان)
3-إنه يكون شخص صبور جدا عشان يبقى عنده صبر يتكلم ويرد
4- إنه يكون فاضى لأنه لو مشغول مش هيلاقى وقت يرد
طيب وفى الحالة التانية لو معرفش حاجة عن الموضوع إلى بيقوله بس عارف إنه كلامه غلط يبقى اسكت وقول حسبى الله ونعم الوكيل وحاول أتعلم وأعرف.
ياجماعه عايزين نبطل نجادل من أجل الجدال عايزين لو فى جدال يبقى عشان إظهار الحق والأصلح للناس .
كل واحد فينا لازم يحترم التانى قوى ويحترم وجهة نظره وكلامه ويرد بمنطق وموضوعية ويتقبل النقد البناء .
وفى الختام هى دى وجهة نظرى لو تقبلتها فلكى منى جزيل الشكر أما لو انتقدتنى فيها فأسشكرك مرتين لنقدك وسأحاول أنا أراجع نفسى
دمتم بود وفى صحة وعافية.

واجب
أتقدم بخالص الشكر والتقدير لكل من
د أحمد غنيم صاحبة مدونة حتى لا أنسى والدكتور مها زين صاحبة مدونة إنها الحياة (وألف مبروك على النجاح) والدكتور محمود صاحب مدونة بطوط الحبوب لتشجيعهم لى على الإستمرار فى الكتابه متشكر جدا

وفى الختام لكم من جزيل الشكر والتقدير

هناك 8 تعليقات:

بطوط حبوب يقول...

بص يا ابو حميد اولا شكرا على الشكر الى مفيش داعى له
بس عشان انت راجل كبره وزى الفل ( ايه رأيك فى التصييت ده)

المهم عشان مطولش وانا جاى غصبن عنى اساسا :)( برضه ده تصييت اهو عد الجمايل انت بس)

الناس الى بتكتب قيه فكريه حاجه من اتنين
اما ناس هايفه وبتقول اى كلام وخلاص ودول لو لقيت الكومنتات مأيداهم فممكن اى حد يرد حتى مش شرط ان يتوافر فيك الشروط الى فوق دى
هى من باب قل وحق وما عليك فيمن سيقتنع به

انما فى ناس اصحاب فكر بجد ومقتنعين بكل حرف وكل كلمه ومستواهم الثقافى عالى ودول بقى عشان تناقشهم لازم تكون بمستواهم عشان يكون كلامك مفيد وعشان متنهزمش


حاجه كمان انا مقتنع بيها
انى مناقش حد غير لما نتفق على لمين نرجع

للكتاب والسنه بفهم الصحابه مثلا لو موضوع دينى
لحد سياسى نرضاه لو موضوع سياسى وهكذا

موضوع كويس بس لسه فى كلام كتير ربنا يسهل

zOzO يقول...

اولا السلام عليكم
ثانيا فحضرتك عند حق
كتير منا بيجادل حتي لو هو الغلط بس بيجادل عشان المجادله وبس
او انه يظهر نفسه

انا مع بطوط حبوب
في كلامه

والشروط اللي اتعرضت
فهي هي دي فعلا الشروط اللي لازم تكون موجوده ف اي شخص بيجادل

احييك ع موضوعك دا
ميرسي لمرورك

nour shahen يقول...

طبعا انا بحترم رأيك بس ممكن انا اطرح موضوع ميكونش عندى خلفيه كبيره بيه غير النقطه اللي طرحتها بالموضوع دا
لكن فعلا لازم الحق احق ان يتبع لو الواحد غلطان يقول مش مشكلة وجل من لا يسهو عادى
تقبل تحياتى واعجابى

أية الشقية الشعنونة يقول...

عندك حق
اشكرنى مرة واحدة لانى متفقة معاك جدا
انا فعلا بقابل ناس كده كتير
تجادل من اجل الجدل
من اجل الانتصار لرايها واظهار شخصيتها فقط
للاسف
موضوع شيق
تمنياتى بدوام لنجاح
تحياتى

mahasen saber يقول...

ايتاذى الكريم ..اولا احنا كلنا متفقين ان الخلاف فى الراى لا يفسد للتدوين قضيه ..انما كلامك مضبوط محدش يقدر يقول حاجه بس فيه سياسة التجاهل يعنى فشلت اساليب النقاش الواعى المحترم خلاص تجاهل ثم تجاهل موضوعك رائع وانا بكتب التعليق ومش مركزه على العموم وصلت فكرتى ولا معرفتش تقبل منى خالص احترامى وتقديرى ..وكل رمضان وحضرتك بالف خير ..وشاكره تشريفك الجميل لمدونتى الف شكر فى رعاية الله وامنه..عايزه اتطلق و.

موناليزا يقول...

وانا احترم وجهة نظرك

mohamed ghalia يقول...

بطوط الحبوب
الواجب واجب ولازم نشكرك يا مان
هتنباس يعنى هتنباس هههههههههههههه.
فعلا عند حق لازم فى أى نقاش يكون لينا كبير نرجعله.
وكمان أنا عارف كويس قوى إنى الموضوع مخدش حقة خالص وكان فيه كلام كتير بس أنا قلت المدونين يشاركونى ويقولوا رلأيهم فى الموضوع
دمت بود ومتشكرين يامان
-----------------------------------

zozo
فعلا عندك حق وياريت بقى نبطل نجادل من أجل الجادل
دمتى بود
متشكر لمرورك
-----------------------------------
nour shahen
عندك حق امتى هنتعلم إنى الواحد لو غلطان يقول أنا غلطان يارب يحصل.
تقبلى تحياتى وإعجابى
شكرا لمرورك
-----------------------------------
أية الشقية الشعنونة
سأشكرك مرتين مرة لرأيك ومرة لمرورك
وربنا يهدينا وندور دايما على الحق
تقبلى تحياتى وأتمنى لكى دوام التوفيق
-----------------------------------
mahasen saber
أكيد كلامك وصل واحنا متفقين تماما
وكل سنة وانتى طيبة وبخير وفى سعادة وهنا وسور وابن حضرتك كمان
متشكر لتشريفك مدونتى
دومتى بود
-----------------------------------
موناليزا
وأنا احترم وجهت نظرك
دمتى بود
وكل سنة وانتى طيبة
----------------------------------

عرين الغضب يقول...

عزيزي محمد :

إذا تبحرنا في أنفسنا كما يجب ، سنجد أننا نرفض وجود أي نسبة خطأ أو أي نسبة نقص بداخلنا !! الكل يرحب بالكمال والتصحيح البناء .. ولكن عن اقتناع !
وهنا يأتي دور الرأي ثم النقد !

من الجائز والوارد أن يؤيدني رأيك !

ولكن حتماً سيلفت نقدك إلى شيء لم أضعه بحسباني .. ربما أقنعي نقدك وعملت به ! ربما جاء نقدك على عكس ما أؤمن به !
نقدك هو محاولة منك لطرح مفهوم أخر من الصواب الذي تقتنع به .. أنه أسلوب إرشادي هادف يا محمد !
وطالما اقتنعت أنت بنقدك ، صدقني سيكون اقتناعك هذا وسيلة جيدة لنشر فكرك وآرائك إلى غيرك ..

لذلك قلت في مدونتي :
(سأشكرك مرة لإبداء رأيك .. وأشكرك مرتين لإبداء نقدك) ..

فطبيعة الإنسان فينا ترفض تماماً استمرار وجوده على خطأ!


تقبل تحياتي .. وصادق رأيي .. وصراحة نقدي ..

وائل عمر!