dupport me

الخميس، 2 أكتوبر، 2008

ربنا يستر

وصلنى تاجين من الأخت العزيزة زوزو وطبعا دول أول تاجين يجولى من أول مبدأت حياتى التدوينية من 3شهور فلازم بقى أجاوب وربنا يستر.
التاج الأول:
السؤال الأول: من أنت؟
حقيقى سؤال صعب جدا إنى الواحد يتكلم عن نفسه بس ممكن تقولوا إنى شخص غريب أحيانا تحس إنى بتكلم كلام كبير قوى يخليكى تاخد فيا مقلب وتقول إنى عبقرى وأحيانا تحس إنى بتكلم كلام ملوش لازمة . إنسان بسيط قوى عمرى مبشيل من حد ودايما بسامح بحب الناس كلها والخير لهم عشان كده عملت مدونتى . بحب القراءة جدااااااااااا وكفاية كده.
السؤال إلى بعده: البطاقة الشخصية
الإسم : محمد إبراهيم ولقب العائلة غالية
تاريخ الميلاد: 25/3/1988 السن:20سنة
المكان للأسف من قويسنا من قرية عرب الرمل (عرب القرأن) فخور بقريتى جداااااااا
الوظيفة : طالب فى الفرقة الرابعة تجارة بنها .
الديانة. مسلم و الحمد لله على نعمة الإسلام
الحالة الإجتماعية: جارى البحث عن عروسة ياريت إلى يعرف يقلى.
السؤال إلى بعده : أحلامك؟
عامة الأحلام عندى ليها مراحل
أول مرحلة إنى أخلص كليتى بتقدير وإنى أحقق هدفى من المدونة وأقدر معاكم نوصل للسعادة
تانى مرحلة إنى أكون محاسب ناجح وإدترى متمكيز
تالت مرحلة ودى بقى حلم العمر إنى يكون عندى أكبر شركة أدوية فى الشرق الأوسط وأعمل طفرة فى مجال الأدوية (مع إنى محاسب مش دكتور)
نفسى كمان أشوف الناس كلها سعيده ومحدش شايل هم الدنيا كلها فوق دماغة. وكمان نفسى أتجوز بدرى عشان أعف نفسى. وكفاية بقى أحلام كده.
السؤال إلى بعده : أقرب شخص ليك ؟
أقرب شخص ليا هو كل شخص حاسس إنه بيحبنى أو إنى بحبه .
التاج الثانى:
السؤال الأول: إيه معنى السعادة من وجهة نظرك وهل حاسس إن سعيد؟
ههههههههههههههه طبعا عشان أقول يعنى إيه السعادة يبقى لازم تقرأ مواضيع المدونة كلها بس أنا هلخصها فى جملة السعادة هى أن ترضى بما سمه الله لك فالرضا هو أول درجات السعادة.
الحمد لله حاسس إنى سعيد وأكيد بتعرض لمواقف بتزعلنى بس بحاول أخرج منها بسرعة؟
تانى سؤال:امتى حسيت انك ظلمت انسان ولية ؟ محتاج للحظة غفران منة ؟
معتقدش والله إنى ظلمت حد يمكن اتظلت لكن ظلمت الحمد لله لا.
محتاج الغفران من كل واحد ولو أسأت ليه بكلمة أو تلميح.
تالت سؤال: بتعمل اية لما تكون مضايق بعد ما تصلى ؟
بفضفض مع أحد أصدقائى المقربين
رابع سؤال: امتى حسيت انك اتظلمت ؟ ولية ؟
بحس بده مع كل واحد يكلمنى بعدم اهتمام أو تقدير ويعاملنى على إنى عيل صغير واللحمد لله ده تقريبا مش بيحصل لإنى كلامى بيفرض على إلى حوليا إنه يحترمنى لإنى كنت زمان وأنا طفل بتعلم فنون الخطابة فكل إلى يعرفنى عارف إنى عندى أسلوب وكمان علم من قرائتى
الحمد لله.
خامس سؤال:اية اكتر احساس بيراودك هذة الايام تجاة نفسك والاخرين ؟
بحاول دايما أغير من نفسى وأسمع للأخرين زى ما تعليقاتكم هفكر فيها كويس جدا وهستفيد منها إن شاء الله
سادس سؤال:امتى ممكن تتنازل عن حق من حقوقك ؟ والسبب ؟
مكدبش عليكم ودى حاجة ناس كتير بتنتقضنى فيها إنى كتير جدا بسيب حقى وبتساهل قوى فيه بس لأنا ممكن أتنازل بمزاجى لأى حد من أصحابى أو أصدقائى أو زملائى.لأنى بحبهم.
الحمد لله خلصت
يارب أكون ضيف خفيف عليكم
كل سنة وحضراتكم طيبيبن ويارب دايما فى سعادة وهنا وسرور
أحبكم فى الله

هناك 33 تعليقًا:

حسن حنفى يقول...

كل سنه وانت طيب

وبخير

اجابات ممتازه

بارك الله فيك يارب

سميرة يقول...

محمد
رددوك مميزة جداً ، ويارب تحقق اولى درجات السعادة وهي الرضا ، وان كان دا شئ مش سهل ومش اي حد بيوصل للمرحلة دي ، وباقي درجات السعادة بتيجي بعد كدا بسهولة ان شاء الله
ربنا يسعدك دايماً
عيد سعيد
تحياتي

maha zein يقول...

يااااااااااااااااااااااااااااااااه
فينك من زمان
وفيني من زمان
كل سنة وانت طيب
واجاباتك كلها وضوح
وبساطة
بس اياك تسيب حقك
اياك
لاي حد
اوعه بجد
هتندم كتير

mahasen saber يقول...

اكتر حاجه استغربتها فى اجابتك وفاجئتنى
هياصغر سنك انا فعلا كنت معتقده انك فى الاربيعنات مثلا...بس على فكره دى مش حاجه وحشه لان ده بيأكد ان عقلك بسم الله ما شاء واعى وكبير وراقى..
وربنا يوفقك وتخلص الكليه بتقدير عالى وتبقى محاسب وتدير اكبر شركة اديه فى الشرق بحاله....
وعلى فكره يا محمد مبتفرقش الانسان عايش فى قريه او مدينه او حتى على سحابه فى السما...
الانسان اليى بيقدر يعمل من المكان جنته وناره فى الغالب...
وممكن تواجدك فى قريه يكون افيد ليك بيتحلك وقت كبير للقرايه ولاهتماماتك ولكل شئ حواليك بتبصله وبتاخده بعين الاعتبار.....
ربنا يوفقك ويكرمك واجابة التاج
اكدت على شخصيتك العاقله
ربنا يكرمك ويحققلك كل ما تتمنا واكثر
وعيد سعيد عليكى
وعلى كل اسرتك
وعلى كل من تحب
وكل سنه وانتا بالف خير وسلام....

مها يقول...

وليه بتقول "للأسف" من قويسنا؟؟
قصدك إنها بعيدة عن القاهرة؟؟
دى حاجة مش مهمة أبداً لأن المكان بالناس اللى فيه مش بالقرب والبعد ..

عجبتنى مدونتك جداً وما توقعتش يكون صاحبها عنده 20 سنة بس.. بجد رائعة ويا رب دايماً متألق ومبدع

enjy يقول...

اول مرة اجى هنا كل سنة وانت طيب ويارب تحقق حلمك بتاع شركة الادوية يااااااااااارب...
انت فخور بقريتك اومال بتقول للاسف ليه؟؟؟؟؟؟؟

Ahmed El-Agouz يقول...

جملية الاجوبة
واجمل ما فيها الصراحة والبساطة
كل عام وانت بخير
العجوز

موناليزا يقول...

ربنا يحقق لك كل ماتتمنى

انا ودماغي يقول...

إجاباتك جميلة اوى و ممتعة و عفوية


و غن شاء الله تقدر تحقق كل اللى تتمناه

حبارير - السعادة - انطلاقة يقول...

أخي محمد أنت إنسان عظيم

حفظك الله

ونفع بك

آمين

الفارس الملثم يقول...

بجد اجابتك جميله اوي , وحسيت فيها انك شخصيه طيبه وتتميز بالعقل والاتزان

تعرف ان تعريفك بنفسك يشبهني بصوره كبيره فانا بحب القرايه اوي وكمان اوقات اقول كلام احس انه كلام كبير اوي واوقات احس ان كلامي عباره عن تخاريف

تحياتي

mohamed ghalia يقول...

حسن الحنفى
كل سنة وحضرتك طيب ويارب دايمل فى سعادة وهنا وسرور
-----------------------------------سميرة
ربنا يسعدك يارب ونقدر كلنا نوصل للسعادة
-----------------------------------
مها زين
ياااااااااااه افتكرتينا أخيرااا
كل سنة وإنتى طيبة
بس أنا مش هتسامح فى كل حاجة فى حجات تستاهل وفى حاجات لا .
-----------------------------------
mahasen saber
أستاذتى الغالية بجد أنا افتقدتك كتير جدا ومتشكر جدااا إنك كنتى دايما بتسألى عنى.
بس مش عارف إنتى ليه إنصدمتى قوى كده لما عرفتى إنى عندى عشرين سنة فى ناس أصحاب مدوناس سنهم أصغر من كده بكتير وبيكتبوا كلام كويس جداااااااا.
أنا قلت إنى فخور بقريتى جداا وفعلا متفرقش .
ربنا يسعدك وكل سنة وحضرتك طيبة ويارب دايما تكونى فى سعادة وهنا وسرور.
-----------------------------------
مها
واضح إنك مش من مصر المصريين بيكرهوا المنايفه جداااا بس أنا طبعا بقول للأسف على سبيل الهزار.
ميرسى لتشريفك المدونة ويارب تكون عجبتك والسن عمره مكان مقياس
كل سنة وحضرتك طيبة.
-----------------------------------
enjy
وإن شاء الله مش هتكون الأخيرة ويارب تكون المدونة عجبتك
أنا فخور بقريتى بس بهزر بس شوية عشان فى ناس كتير مش بتحب المنايفه .
ربنا يحققلك كل أحلامك ودايما بالتوفيق
----------------------------------
ahmed
كل سنة وحضرتك طيب يا عجوز وشكرا على تشريفك المدونة
نورتنى
-----------------------------------
موناليزا
أمين
وربنا يحققلك كل ما تتمنيه
وشكرا على الزيارة .
-----------------------------------
أنا ودماغى
يارب
وإنتى كمان ربنا يوفقكك وتحققى أحلامك وتبقى دكتورة فى الجامعة بس أوعى تسيبى التدوين .
هستناكى تزورينى دايما .
كل سنة وإنتى طيبة.
-----------------------------------
حباير_ السعادة_انطلاقة
أستاذى العزيز
أتعلم من تواضعك الكثير
زادك الله علما ونفع بك
ردودك فى منتها الروعة
بكون سعيد جدا لما أشوف إنك علقت على كلامى .
كل سنة وحضرتك طيب
-----------------------------------
الفارس الملثم
والله دى حاجة تشرفنى إننا نكون متشابهين
كل سنة وحضرتك بخير

Rehab يقول...

اشكرك ..
من كل قلبي..
علي تعليقك علي قصتي...
يارب تعجبك باقي المدونة...
انا بحاول علي قد ما أقدر..
اني اكون واقعية ..

كل سنة وانت طيب..

كيارا يقول...

اللللللللللله اجابات بسيطه وصريحه

كل سنه وانت طييييييييب

تحياتي

قلب ينبض لله يقول...

واحنا كمان نحبك في الله
اجاباتك علي التاج بتقول أنك شخصية متفائله وطموحة
ربنا يحققلك حلم عمرك وتعمل طفرة في مجال صناعة الأدوية

تحياتي

الازهرى يقول...

صديقى العزيز

فالرضا هو أول درجات السعادة

انالنا الله تعالى جميعا هذه الدرجة

تحياتى على الاجابات الجميلة والتى اعتقد انها صادقة لانها نفذت مباشرة الى داخلى

تحياتى دائما

خديجة محسن "لؤلؤة الاسلام" يقول...

ما شاء الله اجابات رائعة
و مدونة جميلة
بس هو كل حاجة تاجات تاجات عايزين بقى غوايش شويه
هههههههههه
و تحياتى
و تقبل مرورى

PrInCeSS BeRy يقول...

محمد



ازيك وكل سنة وانت بالف خير يارب تكون تمام

تاجك عرفنى بيك امتر واسلوبك جميل وبسيط وربنا يكرمك شكلك حد طيب اوى

الوردة البيضا يقول...

الأخ محمد
كل سنة وانت طيب، وربنا يسعدك ان شاء الله ويحقق لك كل ما تتمنى
حأكون سعيدة لو شرفتني على مدونتي الجديدة وقولتلي رأيك

مرسي مقدما

أختكم فى الله يقول...

ما شاء الله

اجابات جميلة

ربنا يحققلك كل احلامك ويسعدك

مدونة حضرتك هايلة

اسمحلى باضافتها عندى فى المفضلة ومداومة متابعتها

ماما أمولة يقول...

كل عام وانت طيب يا محمد

اجاباتك جميلة

ربنا يحققلك كل امالك يارب

تقديري واحترامي

قطرات من شواطئ الحياة يقول...

ما أجمل ردودك و خاصة : (( السعادة هى أن ترضى بما سمه الله لك فالرضا هو أول درجات السعادة ))
أدام الله عليك السعادة و الوفق !

المستنصر بالله يقول...

اسم مدونتك جميل واجاباتك اجمل وصريحه قوى وعفويه
بالتوفيق ان شاء الله

تحياتى لحضرتك

mohamed ghalia يقول...

rehab
شكرا لمرورك
كل سنة وحضرتك طيبة
-----------------------------------
كيارا
كل سنة وحضرتك بخير ويالتوفيق دايما
-----------------------------------
قلب ينبض لله
أشهد الله أنى أحبكم جميعا فى الله
ربنا يسعدك وتحققى كل أحلامك
----------------------------------
الأزهرى
نعم الرضا هو أول درجات السعادة
اسأل الله أن يرزقنا جميعا الرضا
----------------------------------
خديجة محسن لؤلؤة الإسلام
إن شاء الله هنشوف موضوع الغوايش ده
كل سنة وحضرتك بخير
----------------------------------
princess bery

كل سنة وحضرتك بخير
ده بس من ذوقك والله
ربنا يحفظك
-----------------------------------

الوره البيضا
كل سنة وحضرتك وبخير
وربنا يسعدك وتحققى كل أحلامك
أكيد هزورها
----------------------------------
أختم فى الله

كل سنة وحضرتك بخير
اتفضلى ضفيها ده شرف ليا
----------------------------------
ماما أمولة
كل سنة وإنتى طيبة يا ماما
ربنا يسعدك يارب
شرفت بزيارة مدونتك
-----------------------------------
قطرات من شواطىء الحياة
أكيد الرضا ده حاجة مهمة جدااا
كل سنة وحضرتك بخير
وربنا يسعدك
----------------------------------
المستنصر بالله
يارب مضمون المدونة كمان يعجبك
كل سنة وحضرتك بخير
تقبل تحياتى

شفقة هانم واحسان بك يقول...

كل سنة وانت طيب
اجابات نموذجية عرفتنا بشخصكم الكريم

~*§¦§ Appy §¦§*~ يقول...

اولا كل سنه وانت طيب
ثانيا ميرسي لكلامك عندس ثالثا قوسينا ليه فيها اصحاب بس قويسنا نفسها
وبروح البرج كتيررررررر
ثالثا اسم مدونتك لذيذ يا رب تلاقى السعاده واحنا كمان

zOzO يقول...

اولا كل سنه وانت طيب

بالنسبه للتاج بقي
فانا من قبل ما اعرف سنك دلوقت حسيت انك حد كبير في السن فعلا
مش شاب وطالب جامعي
حاساك راكز اوي
مش زيي طبعا
هههههههههههههه

اجاباتك كلها حلوه
ومتميزه
بجد تخلي اللي بيقرا يكملها كلها
تحياتي ليك

oRiGiNaL HeArT يقول...

السلام عليكم ورحمة الل وبركاته

انا اول مرة اجى هنا بس مدونتك جميلة اوى وعجبتنى الروح البسيطة اللى فيهاواجاباتك هيلة بجد
بتدل على انك شخص طيب اوى
ربنا يكرمك ويحققلك كل اللى بتتمناه
تحياتى

CAIROCOMPUTER يقول...

ندعوكم للأشتراك فى برنامجنا الأذاعى وهو عن النت والمدونات ويذاع يوميا من الأذاعه الرئيسيه لمصر ...
كافة التفاصيل فى مدونتنا وموقعنا
المدونه
http://netonradio.blogspot.com
ويمكن الدخول للموقع من رابط بالمدونه
ويهمنا سماع آراءكم فى الأسئله المطروحه فى المدونه لأذاعتها
ويسعدنا ان نشير فى برنامجنا الى هذه المدونه
تحياتنا واطيب التمنيات

mohamed ghalia يقول...

شفقة هانم واحسان بك
كل سنة وحضرتك بخير
أنا إلى سعيد بمعرفة حضرتك
تقبلى تحياتى
-----------------------------------
appy
كل سنة وحضرتك بخير
دى حاجة كويسه إنك يكون عندك أصدقاء فى قويسنا ده شرف لقويسنا كلها
وقدام بتيجى البرج ابقى عدى وانتى رايحة
نحياتى
----------------------------------
zozo
طولتى غيابك قوى
كل سنة وانتى بخير
وأدينى جاوبت التاج ولابلاش توريطات تانى
متشكر جدا على كلامك الحلو ده ده بس من بعض ما عندكم.
----------------------------------
oRiGiNaL HeArT
وعليكم السلام ورحمة الله وبركاته
الحمد لله إنى المدونة عجبت حضرتك
ووربنا يحققلك كل أحلامك يارب
---------------------------------

nour shahen يقول...

نبدا من الأخر للأول

جميل انك تتنازل وعجبتنى قوى كلمة بمزاجى , اكيد بتعلن عن روح طيبه لكن برضوا قويه في نفس الوقت

ربنا يحقق ليك أحلامك بس انا اعتقدت ان حلمك يكون بشركة تجاريه مش ادويه
وعامة مفيش شيء بعيد عن الله

وبعدين نهارك أبيض بتبحث بره عن عروسه والمدونات موجودين ههههههههههههه لسه سنك صغير يا محمد ركز في دراستك الأول
ويا رب اول ما تخلص الدراسه وتشتغل وتستقر تتمتع بحياه هاديه مع أنسانه صالحه تصونك وتراعى فيك ربنا

ربنا يكرمك ويبارك فيك ويقدرنا نطلع جيل من الشباب والبنات يتعلموا الخطابه منذ الصغر , ونربى عقول قبل أجساد

د. محمد رضــــا .. هل تراني يقول...

تمام والله

انت بلدياتي بقى

انا من قويسنا المولد والاقامه حاليا


سعيد بك وبمرورك عندي وبمعرفتك

كل الود والتوفيق لك


اخوك محمد

Hassan shawqy يقول...

جزاك الله خيرا يا عم محمد انك تبحث عن السعادة فى زمن قلت فيه الابتسامه ولا نجد فيه سعادة ولكن السعادة الحقيقية فعلا فى رضى الله